شاہین آفریدی اور سلمان آغا کے درمیان جھگڑے کی افواہیں بے بنیاد قرار، پی سی بی کا سخت

 شاہین آفریدی اور سلمان آغا کے درمیان جھگڑے کی افواہیں بے بنیاد قرار، پی سی بی کا سخت ردعمل

لاہور: پاکستان کرکٹ بورڈ (PCB) نے ویسٹ انڈیز کے دورے کے دوران شاہین شاہ آفریدی اور کپتان سلمان آغا کے درمیان کسی قسم کے جھگڑے کی خبروں کو مکمل طور پر بے بنیاد، من گھڑت اور بدنیتی پر مبنی قرار دے دیا ہے۔

پی سی بی کی جانب سے جاری کردہ بیان میں کہا گیا ہے کہ میڈیا اور سوشل میڈیا پر گردش کرنے والی یہ افواہیں جھوٹ پر مبنی ہیں اور ان کا حقیقت سے کوئی تعلق نہیں ہے۔ بورڈ کے مطابق نہ تو کسی تربیتی سیشن کے دوران اور نہ ہی کسی اور موقع پر کوئی ناخوشگوار واقعہ پیش آیا۔

بیان میں مزید کہا گیا:
"یہ افواہیں دانستہ طور پر ٹیم میں اختلاف پیدا کرنے اور قومی اسکواڈ کے اتحاد، حوصلے اور ساکھ کو نقصان پہنچانے کے لئے پھیلائی گئی ہیں۔"

پی سی بی نے واضح کیا کہ وہ ان افواہوں کو پھیلانے والے عناصر کے خلاف سخت قانونی کارروائی کا آغاز کرے گا، جس میں ہتکِ عزت اور سائبر کرائم کی دفعات کے تحت کارروائی شامل ہے۔

کھلاڑیوں کی ساکھ کے تحفظ کا عزم

بورڈ نے اس عزم کا اظہار کیا ہے کہ وہ اپنے کھلاڑیوں، کوچنگ اسٹاف اور قومی ٹیم کے تقدس کو غیر ضروری اور جھوٹ پر مبنی قیاس آرائیوں سے محفوظ رکھنے کے لیے ہر ممکن اقدامات کرے گا۔

یاد رہے کہ شاہین شاہ آفریدی ویسٹ انڈیز کے خلاف پاکستان کے اسکواڈ کا حصہ ہیں، جہاں پاکستان اور ویسٹ انڈیز کے درمیان T20I اور ODI سیریز کھیلی جا رہی ہے۔

پاکستان بمقابلہ ویسٹ انڈیز: ٹی 20 سیریز کا شیڈول

• پہلا ٹی 20 میچ: 1 اگست 2025

• دوسرا ٹی 20 میچ: 3 اگست 2025

• تیسرا ٹی 20 میچ: 4 اگست 2025
  تمام میچز فلوریڈا کے سنٹرل برووارڈ پارک اینڈ برووارڈ کاؤنٹی اسٹیڈیم میں کھیلے جائیں گے۔

---